सुनकोशी समाचार
रबिन्द्र खड्का
चौतारा,चौथो तोप–२१ प्रथम चौतारा साँगाचोकगढी नगर कप राष्ट्रिय खुला क्लब स्तरीय भलिबल प्रतियोगिताको उपाधि नेपाल पुलिस क्लबले जितेको छ ।
सदरमुकाम चौताराको टुँडिखेल मिनिरंगशालामा बुधबार भएको फाइनलI खेलमा चिरपरिचत प्रतिद्वन्द्वी क्लब गण्डकी प्रदेशलाई स्तब्ध पार्दै पुलिसले उपाधि हात पारेको हो । एक पक्षीय जित निकाल्ने क्रममा पुलिसले गण्डकीलाई २५–१६, २५–१८ र २५–२२ को सोझो सेटमा पराजित गर्यो
उपाधिसँगै पुलिसले ३ लाख रुपैयाँ नगद पुरस्कार प्राप्त ग¥यो । उपविजेतामा चित्त बुझाउन बाध्य गण्डकीले १ लाख ५० हजार रुपैयाँ नगद पुरस्कार हात पार्यो । सेमिफाइनलमा पुलिसले अर्को विभागीय टोली सशस्त्र प्रहरी बल र गण्डकीले अर्को बलियो टोली कोसी प्रदेशलाई पराजित गर्दै फाइनलमा स्थान बनाएका थिए ।
प्रतियोगिताको तेस्रो स्थान कोसी प्रदेशले हाँसिल गर्यो । कोसीले नगद ७५ हजार रुपैयाँ पुरस्कार पायो । तेस्रो स्थानको लागि भएको खेलमा कोसीले सशस्त्र प्रहरीलाई पराजित गरेको थियो ।
प्रतियोगिताको विधागत पुरस्कारमा पुलिसकै खेलाडीको वर्चस्व रह्यो । पुलिसलाई फाइनलसम्म पुर्याएर उपाधि दिलाउन उत्कृष्ट प्रदर्शन गरेका पुलिसका रविनचन्द ठकुरी सर्वोत्कृष्ट खेलाडी घोषित भए । कोसीका सन्तोष राई उत्कृष्ट लिवरो, पुलिसका बलराम गुरुङ उत्कृष्ट सेटर, पुलिसकै सफल बिक उत्कृष्ट ब्लकर घोषित हुँदा गण्डकीका सञ्जुबिक्रम साहले उत्कृष्ट स्पाइकरको उपाधि जिते । उनीहरुले जनही १० हजार रुपैयाँ नगद पुरस्कारसहित ट्रफी पाए ।
विजेता टोली र खेलाडीहरुलाई बागमती प्रदेशका सांसद एवम् पूर्व मन्त्री युवराज दुलालले ट्रफी, मेडल र नगद पुरस्कार वितरण गरेका थिए । तोप–२१ चौताराको आयोजना र चौतारा साँगाचोकगढी नगरपालिकाको प्रवर्द्धनमा पाँच दिन चलेको प्रतियोगितामा तीन प्रदेश र तीन विभागीयसहित सात टोलीले प्रतिस्पर्धा गरेका थिए ।
यसअघि तोप–२१ ले दुई संस्करण राष्ट्रिय क्लब स्तरीय फुटबल र एक पटक राष्ट्रिय स्तरकै खुला ब्याडमिन्टन प्रतियोगिता आयोजना गरेको थियो । फुटबल हुने टुँडिखेल मैदानमा मिनिरंगशाला निर्माण हुन थालेपछि खेल मैदान अभावमा आयोजकले ब्याडमिन्टन र भलिबल आयोजना गरेर प्रतियोगितालाई निरन्तरता दिँदै आएका छन् । रंगशाला तयार भएपछि पुनः फुटबल प्रतियोगितालाई नै निरन्तरता दिने तोप–२१ ले जनाएको छ ।